Ikastetxeak (Barnetegiak)

• Puntako hezkuntza jaso eta unibertsitaterako prestatu: Britainiar tituluak mundu osoko unibertsitateen aintzatespena eta errespetua dute. Britainiar barnetegiek puntako hezkuntza, instalazio eta laguntza eskaintzen dute. Erresuma Batuko hezkuntzak zure ezagutza eta gaitasunak garatzeko motibazioa pizten du, sortzaile izateko askatasuna eta zure esku diren emaitzarik onenak lortzeko emanez.
• Presta zaitez zure ametsetako ibilbide profesionalerako: Britainiar barnetegi batean ikasteak oinarri sendoa emango dizu aukeratu duzun lanbide horretarako. Erresuma Batuan bizitzean mundu osoko ikasleekin adiskidetzeko eta zure ingeles maila hobetzeko aukera izango duzu. Gainera, beste kulturak ulertzen ikasiko duzu. Horrek guztiak nazioarteko negozioen mundurako prestatzen lagunduko zaitu.
•  Zure hizkuntza-gaitasunak hobetu: Ikasgeletan ikasle gutxi daudenez eta esperientzia handiko irakasleak izango dituzunez zure jariotasuna azkar garatuko dela bermatzen dizute... eta britainiar ahoskerarekin hitz egingo duzu! Eskolak hasten direnean zure ezagutzak modu naturalean hobetzen direla nabarituko duzu.
• Kultura-abentura zoragarria bizitzeko aukera: Erresuma Batuan ikasteak mundu osoko lagunak egiteko aukera emango dizu. Gainera, irakasle eta ikaskideekin egingo dituzun txangoetan Erresuma Batuko hiri eta landa-gune zoragarriak ezagutzeko aukera izango duzu. Harrituta geratuko zara britainiar barnetegietan musikak, antzerkiak, arteak, oratoriak, elkarteek edota kirolak zein nolako garrantzia duten ikusten duzunean.
• Nazioarteko komunitate batean barneratu: Britainiar barnetegietan hainbat sinismen, nazionalitate eta kulturetako ikasleak elkartzen dira. Beste kultura horiek guztiak ulertzeko trebetasunak eskuratuko dituzu.
• Bermatutako kalitatea: Hezkuntza-zerbitzuak eskaintzeko eta ikasleei ostatu emateko, Erresuma Batuko barnetegiek gobernuak eta beste zenbait hezkuntza-erakundek ezarritako baldintza guztiak bete behar dituzte. Estandar horien barne eskaintzen den hezkuntzaren kalitatea, ostatua, ikasleen gizarte-laguntza, instalazioak eta beste hainbat alderdi sartzen dira

GASTUAK

Ikasketak hasi baino lehen ondo aztertu zein nolako gastuak izango dituzun eta nola ordainduko dituzun zure ikasketak. Ikastetxe bakoitzak bere prezioak finkatzen ditu.

Barnetegi pribatuetan jasotzen duzun hezkuntzagatik, ostatuarengatik eta janariarengatik ordaindu beharko duzu. Ikasle gazteenen kasuan, ordaindu beharreko kopurua, batez beste, 6.000 libera ingurukoa da hiruhileko bakoitzeko. Sixth form mailan (seigarren maila, 16 eta 18 urte bitarteko nerabeentzat bigarren mailako hezkuntzan diren aukerako azken bi urteak) kopuru hori 9.000 liberetaraino igo daiteke.

Barnetegi publikoetan hezkuntza doakoa da baina ostatuarengatik eta janariarengatik ordaindu beharko duzu. Kasu horretan, ordaindu beharreko kopurua erdiraino jaitsi daiteke eta, hiruhileko bakoitzeko, 2.000 eta 4.000 libera arteko izan daiteke.

Barnetegiko kuotak, normalean, ostatua, janaria eta edariak eta garbiketa zerbitzuak ordaintzeko erabiltzen dira. Hala ere, bestelako ordainketak egin beharko dira, adibidez, uniformea, liburuak, bidaiak, txangoak... Barnetegian bertan galdetu beharko duzu kuotekin zein gastu ordaintzen diren eta zein gastu geratzen diren kanpoan.

Kontuan hartu beharko dituzun bestelako gastuak:

• Erresuma Batura bidaia
• Osasun eta bidaia-aseguruak
• Bizitza soziala egiteko dirua: zinera joateko, goxokiak erosteko, aisialdirako... 

BEKA EDO LAGUNTZAREN BAT JASO DEZAKET?

Britainiar barnetegietan ikasten ari diren hainbat ikaslek beka edo diru-laguntzaren bat dute. Beka batek ordaindu beharreko tasetan murrizketa bat suposatzen du, normalean, alor zehatz batean frogatutako bikaintasuna dela eta, adibidez, lan akademiko batean edo musikan. Bekak ordainsari guztiak ordaintzeko gaitasuna ez duten ikasleei eskaintzen zaien laguntzak dira. Bekak, diru-laguntzak edo finantzaketa lortzeko lehia oso handia izaten da baina merezi du eskura dituzun aukerak aztertzea.

Ikastetxe bakoitzak berariazko sarrera baldintzak ezartzen ditu. Sixth form mailan (seigarren maila, 16 eta 18 urte bitarteko nerabeentzat bigarren mailako hezkuntzan diren aukerako azken bi urteak) sartzeko ikastetxe gehienek gutxieneko nota bat eskatzen dute bigarren hezkuntzan eskaintzen diren azterketetan (adibidez, GCSEs edo IGCEs), batez ere, ikasten jarraitu nahi diren ikasgai horietarako.

• Zenbait kasutan, ikastetxeek elkarrizketa pertsonal bat izatea nahi dute ikasleekin eta bere gurasoekin. Elkarrizketa horiek ez dira beldurtzeko, ostera, oso adeitsuak izaten dira. Zalantzak argitzeko aukera ezin hobea dira eta ikastetxeko ordezkariek benetan zeintzuk diren zure helburuak ezagutzeko aukera izan dezakete.
• Hainbat ikastetxeetan sarrera azterketa bat egiten dute. Modu horretan, gaitasun akademiko onenak ditzuten ikasleak hartzen dituztela bermatu nahi dute. Beste batzuk, ostera, ez dituzte emaitza horiek aintzat hartzen baina bai erabiltzen dituzte ikasle bakoitzak dituen beharrak identifikatzeko. Ez kezkatu azterketa horiengatik. Gaitasun eta talentu desberdinetara egokitzen diren ikastetxe asko daude.
• Ingeles mailari dagokionez, ikastetxeek maila desberdinetako ikasleak hartzen dituzte. Zenbait kasutan, zure mailaren arabera, ikasturtea hasi baino lehen edo ikasturtean zehar ikastaro bat egitea gomendatu ahal dizute. Modu horretan, eskolan jorratzen diren edukiak ulertzen dituzula bermatu nahi dute.